پەرلەمانی کوردستان یادی ٨ی مارس بەرز راده‌گرێ

07/03/2019 09:15:00 ص
سەعات ١١ی پێشنیوەرۆی ئەمڕۆ بەئامادەبوونی د.ڤالا فەرید ئیبراهیم، سەرۆکی پەرلەمانی کوردستان و هێمن هەورامی، جێگری سەرۆکی پەرلەمانی کوردستان و هیوا نەسرەدین بەڕێوەبەری گشتیی دیوان و تەواوی کارمەندە ئافرەتەکانی پەرلەمانی کوردستان، یادی ٨ی مارس، رۆژی جیهانیی ئافره‌تان  بەرز ڕاگیرا.
سەرەتا د.ڤالا فەرید، سەرۆکی پەرلەمانی کوردستان، بەناوی سەرۆکایەتیی پەرلەمانی کوردستانه‌وه‌ پیرۆزبایی لە ئافرەتانی کوردستان و عێراق و جیهان کرد و ڕایگەیاند: " ٨ی مارس بەری خەباتی ئافرەتانە لەپێناو هێنانەکایەی دادپەروەری و یەکسانی لە کۆمەڵگە"، پاشان باسی لە هەوڵەکانی پەرلەمان کرد کە لەرابردوو ئەنجامی داون لەپێناو هێنانە کایەی دەرفەتی زیاتربەئافرەتان لەرێگەی دانانی یاساو  هەموارکردنەوەی یاسا کۆنەکان.
هاوکات ئەوەی نەشاردەوە کە داب و نەریت لە هەندێک بارودۆخدا زۆر لەهێزی یاسادانان و حکومەت بەهێزترە، چونکە تا ئێستاش کوشتنی ئافرەت بەبیانووی شەڕەف بوونی هەیە، بەڵام خولی نوێی پەرلەمانی کوردستان هەماهەنگ دەبێت بۆ تێکشکاندنی ئەو بەربەستانەی کە دەبنە هۆکار لەبەردەم پێشخستنی رەوشی ئافرەتان، بۆیە ئافرەتان پێویستە هێزو توانای خۆیان نیشانبدەن و پشت بەتوانا و لێهاتوویی خۆیان ببەستن بۆ بەرەوپێشچوونیان لە هەموو کایەکانی ناو کۆمەڵگەو خولی پێنجەمی پەرلەمانیش رۆلی کاراو کاریگەر لەو پێناوەدا دەگێڕیت.
پاشان هێمن هەورامی، جێگری سەرۆکی پەرلەمانی کوردستان، پیرۆزبایی لە سەرجەم کارمەندە ئافرەتەکانی پەرلەمان و کوردستان و جیهان کردو رایگەیاند: "ئێمە لە پەرلەمانی کوردستان بەدوو ئاراستە کار دەکەین، ئەوانیش رەخساندنی دەرفەتی زیاتر بۆ کارمەندانی پەرلەمان، ئاراستەی دووەمیش فەراهەمکردنی ماف و تایبەتمەندیی زیاتر بۆ ئافرەتان بۆئەوەی رۆلی خۆیان لەسەر بنەمای توانا و لێهاتووییان زیاتر بگێڕن"، جێگری سەرۆکی پەرلەمان بەڵێنیشیدا لە خولی نوێی پەرلەمانی کوردستان گرنگیی زیاتر بە ئافرەتان بدرێت لە رێگەی تواناو ئەو یاسایانەی کە پەیوەستن بە ئافرەتانەوە بۆئەوەی هەموو رۆژێک ٨ی مارس بێت بۆ ئافرەتان.
 
 

رۆژمێرى رووداوه‌كان

>