پەیامی جێگری سەرۆكی پەرلەمانی كوردستان لە ساڵیادی بۆردومانكردنی شاری قەڵادزێ

23/04/2017 10:23:00 م

لە رۆژێكی وەكۆ ئەمڕۆ لە ساڵی 1974 دا ڕژێمی بەعسی لەناوچوو بەشێوەیەكی دڕندانە و بەچەكی ناپاڵمی قەدەغەكراو، شاری قەڵادزێی بۆردومانكرد و لە ئاكامدا سەدان هاووڵاتی و مامۆستا و قوتابی زانكۆ شەهید و برینداربوون و شارەكە خاپووركرا . لە 24/4/ 1982 دا، جەماوەری ئەم شارە یادی ئەم كارەساتەیان كردەوە، بەڵام دیسان هێزەكانی رژێمی بەعس تاوانێكی تریان ئەنجامدا و لە ئاكامدا دوو ئافرەتی شۆڕشگێر بەناوەكانی (ئامینە) و (سنەوبەر) شەهیدبوون و چەندین هاووڵاتی بریندابوون و بەدەیانیش دەسگیركران.

بۆردومانكردنی زانكۆ و خەڵكی سڤیل لە شاری قەڵادزێ‌، پێشێلكردنێكی ئاشكرای یاسا و رێسا و رێككەوتننامە نێودەوڵەتییەكان بوو، بەڵام كۆمەڵگەی نێودەوڵەتی و بەهۆی بەرژەوەندییە سیاسییەكانی وڵاتە زلهێزەكانی ئەو كاتە لەئاست ئەو تاوانە بێدەنگییان هەڵبژارد، ئەو بێدەنگییەش ڕێگەی زیاتری بۆ ڕژێمی بەعس خۆشكرد كە پیلانی گەورەتر دابڕێژێت بۆ جینۆسایدكردنی گەلی كوردستان تا گەیشتە ڕاددەی كیمیابارانكردنی هەڵەبجە و ئەنجامدانی شاڵاوی دڕندانەی ئەنفال و بێسەروشوێنكردنی دەیان هەزار لە خەڵكی بێتاوانی كوردستان.

لەكاتێكدا ئەم یادە بەرز ڕادەگرین، ئۆمێدمان زۆرە بە یەكڕیزی نێوماڵی كورد بۆ ڕووبەڕووبوونەوەی پیلانەكانی ناحەزان و دوژمنانی كوردستان و بەدیهێنانی مافەكەمان لە سەربخۆیی.

هەر لەم یادەدا بە ئەركی سەر شانی سەرجەم دەزگا و لایەنە پەیوەندیدارەكان دەزانین كە لە ئاست قوربانیدانی شاری قەڵادزێ، خزمەتێكی شایستە بە كەسەكاری شەهیدانی ئەم كارەساتە پێشكەشبكرێت.

دروود و سڵاو بۆ گیانی پاكی شەهیدانی قەڵادزێ‌ و سەرجەم شەهیدانی كورد و كوردستان.

 

 

دكتۆر جەعفەر ئیبراهیم ئێمینكی

جێگری سەرۆكی پەرلەمانی كوردستان

24/4/2017


رۆژمێرى رووداوه‌كان

په‌خشى راسته‌خۆ