راگەیەندراوێک لە سەرۆکایەتی پەرلەمانی کوردستانەوە

17/01/2015 06:58:00 م
چەند رۆژێکە لە کەناڵەکانی راگەیاندنەوە  باس لەوە دەکريت کە لایەنيکی سیاسی کوردستانی داوای ئەوە دەکات، شنگال بکرێتە کانتۆنيکی سەربەخۆ، ئێمە لە سەرۆکایەتی پەرلەمانی کوردستان بە توندی ئەم جۆرە بیریکردنەوەیە رەت دەکەینەوەو بە هەڕەشەی دەزانین بۆ یەكپارچەیی خاكی هەرێمی كوردستان، پێمان وایە ئەم جۆرە هەنگاوانە کوردستان دەگەڕێنێتەوە بۆ سەردەمی شەڕی ناوخۆ، کە بەسەر چەند ئیدارە و كانتۆنێكدا دابەش ببوو، لە هەمانکاتیشدا ئەم هەنگاوە پێچەوانەی دەستوور و یاسا ئیدارییەکانی هەرێمی کوردستانە.
قسە کردن لە سەر بە کانتۆنکردنی شاری برینداری شنگال کە هێشتا بەشێکی گرنگی لە ژێر دەستی تیرۆریستانی داعشدایە، پێچەوانەی ئەو یەکدەنگییەیە کە لە نێوان لایەنە سیاسیەکانی هەرچوارپارچەی کوردستان دروست بوەوە و هەروەها دژی یەک سەنگەری نێوان هێزی پێشمەرگە و شەرڤانانە، کە لە چەند مانگی رابردوودا لە کۆبانیەوە تا جەلەولا دروست بوەوە، هەنگاوێکە بۆ لێکترازان و چاندنی تۆی دووبەرەکی لە نێوان پێکهاتەکانی گەلەکەماندا، بیرکردنەوە لە درووستکردنی کانتۆن لە کاتێکدا بەداخەوە تا ئێستاش سیمای دوو ئیدارەیی لە هەرێمی کوردستان دەبینرێت و بە هەمو لایەکمانەوە کار بۆ ئەوە دەکەین ئاسەوارەکانی دوو ئیدارەیی نەیەڵین و هێزی پێشمەرگەی کوردستان یەک بخەین و  بیکەینە هێزێکی نیزامی، نەک بیر لە درووستکردنی کانتۆنێکی تر بکرێتەوە.پێویستە سەرجەم هێزە سیاسییەکانی کوردستان، بەرپرسانە مامەڵە لەگەڵ ئەم دۆخەدا بکەن و ناکۆکییەکان قوڵتر نەکەنەوەو درێژە بە گیانی پێکەوە جەنگان دژ بە تیرۆرستان بدەن و هەنگاوەکانیش دەستپێبکەنەوە بۆ بەستنی کۆنگرەی نەتەوەیی و یەکخستنی گوتاری هاوبەشی نەتەوەیی.

سەرۆکایەتی پەرلەمانی کوردستان
      ١٧/١/٢٠١٥


رۆژمێرى رووداوه‌كان

په‌خشى راسته‌خۆ