راگه‌یه‌نراوی لیژنه‌ی مافه‌كانی مرۆڤ له‌رۆژی جیهانی جاری گه‌ردوونی مافه‌كانی مرۆڤ

10/12/2014 03:41:00 م
پرسی مافەکانی مرۆڤ لەهەرێمی کوردستان یەکێک لەو بابەتە گرنگانەیە کەڕەهەندێکی گەورەی جیهانی هەیەو پێوەرێکی ناسینی شێوازی سیستمی حوکمڕانیە، هەروەک چۆن پارێزگاری کردن لەدەستەکەوتە نەتەوەیی و نیشتمانیەکانمان بەڕێزگرتن لەمافەکانی مرۆڤەوە دەست پێدەکات.
هەرێمی کوردستان دەستکەوتی گەورەی لەزۆر بواردا بەدەست هێناوە، چۆن تیرۆر هەڕەشەیە لەسەر ئەم دەستکەوتانەمان، ئاواش پێشێلکاری مافەکانی مرۆڤ ناوو ناوبانگ و حوکمڕانتێتیەکەشمان دەخاتە ژێر پرسیار، بەتایبەت ئێمە گەلێکین هێشتا لەپێناو مافە سەرەتاییەکانماندا تێدەکۆشین . 
لەئێستادا کەیادی ڕۆژی جیهانی مافەکانی مرۆڤ دەکەینەوە، بەدرێژایی 1050 کیلۆمەتر شەڕی هێزێکی تیرۆریستی مەترسیداری جیهانی وەک داعش دەکەین و لەو پێناوەشدا پێشمەرگە و هێزەکانی تری ناوخۆ قوربانی گەورەیان بەخشیوە، کوردانی ئێزیدی و سەرجەم پێکهاتە ئاینی و نەتەوەییەکانی وەک مەسیحی و تورکمان و کاکەیی و شەبەک ڕوبەڕووی جینۆساید بونەتەوە، جگە لەوە (2) ملیۆن ئاوارە لەهەرێمی کوردستاندان و لەم وەرزی سەرمایەدا لەدۆخێکی خراپی مرۆییدا ژیان دەگوزەرێنن.
ئافرەتان ڕوبەڕووی توندوتیژی جۆراوجۆر دەبنەوە، منداڵان بەهەمان شێوە توندوتیژیان بەرامبەر ئەنجام دەدرێت، ڕۆژنامەنوسان لەزۆر کاتدا ڕوبەڕووی ئاستەنگ و پەلامار دەبنەوە، بەداخەوە هێشتا کەیسی تیرۆری 3 ڕۆژنامەنوس لەدۆسێی ئەم حوکمڕانێتیەدایە، لەخۆپیشاندانەکانی 17ی شوباتدا 10 هاوڵاتی و پۆلیس شەهید بووەو دۆسێی ئەنجامدەرانی تاوانەکان یەکلا نەکراونەتەوە، بەندکراوو ڕاگیراوان لەزیندانەکاندا وەک پێویست مامەڵەی تەندروستیان لەگەڵ ناکرێ و ڕەوشی زیندانەکان خراپن، ئەشکەنجەدان بوونی هەیە، تاکو ئێستا کەیسی نزیک بە 400 ئینسانی کورد بەبێ سەروشوێنی ماوەتەوە.
لەڕووی خۆراک و تەندروستی و هاتوچۆو زۆر بواری ترەوە مافەکانی مرۆڤ پێویستی بەپێداچونەوەو بەدەمەوە هاتنی زیاتر هەیە، دەزگا ئەمنیەکان کەخاک و خەڵکمان دەپارێزن پێویستیات بەهۆشیاری زیاترە بۆ ڕێزگرتن لەمافەکانی مرۆڤ .
لەلیژنەی مافەکانی مرۆڤ لەپەرلەمانی کوردستان بەهەموو لایەکمان بەهاوکاری و پشتیوانی سەرۆکایەتی پەرلەمانی کوردستان دەمانەوێ لەم خولەدا بەشێک لەو دۆسێیانە بگەیەنینە ئەنجام و لەچاودێری و بەدواداچونی هەموو ئەو سکاڵاو یاداشت و داخوازیانەوەین کەڕوو لەلیژنەکەمان دەکات و ئامانجیشمان ئەوەیە هەرێمی کوردستان لەهیچ لیستێکی پێشێلکاری مافەکانی مرۆڤ دا ناوی نەبێت لەپێناو جوانترکردنی سیمانی هەرێمی کوردستان و پارێزگاری زیاتر لەدەستەکەوتەکانمان.
لیژنەی مافەکانی مرۆڤ
10/12/2014

رۆژمێرى رووداوه‌كان

په‌خشى راسته‌خۆ